ਅੰਮ੍ਰਿਤਸਰ, 18 ਨਵੰਬਰ, 2025 (ਫਤਿਹ ਪੰਜਾਬ ਬਿਊਰੋ): ਤਰਨਤਾਰਨ ਵਿਧਾਨ ਸਭਾ ਹਲਕੇ ਦੀ ਉਪ ਚੋਣ ਨੇ ਪੰਜਾਬ ਵਿੱਚ ਇੱਕ ਨਾਟਕੀ ਰਾਜਨੀਤਿਕ ਮੋੜ ਲਿਆ ਦਿੱਤਾ ਹੈ ਜਿਸ ਨਾਲ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨੂੰ ਇੱਕ ਮੋਹਰਲੀ ਕਤਾਰ ਵਿੱਚ ਖੜ੍ਹਾ ਕਰ ਦਿੱਤਾ ਹੈ ਅਤੇ ਨਵੇਂ ਉੱਭਰੇ ‘ਪੰਥਕ ਗਠਜੋੜ’ ਵਿੱਚ ਡੂੰਘੀਆਂ ਦਰਾੜਾਂ ਖੁੱਲ੍ਹ ਕੇ ਸਾਹਮਣੇ ਆ ਗਈਆਂ ਹਨ ਜਦਕਿ ਇਹ ਗੱਠਜੋੜ ਭਵਿੱਖ ਵਿੱਚ ਸਿੱਖ ਰਾਜਨੀਤੀ ਦੀ ਅਗਵਾਈ ਕਰਨ ਦੀ ਵੱਡੀ ਉਮੀਦ ਲਾਈ ਬੈਠਾ ਸੀ। ਹਾਰ ਦੇ ਵੱਡੇ ਫਰਕ ਨੇ ਵਾਰਿਸ ਪੰਜਾਬ ਦੇ (ਡਬਲਯੂਪੀਡੀ), ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ), ਪੁਨਰਗਠਿਤ ਅਕਾਲੀ ਦਲ ਅਤੇ ਇੱਥੋਂ ਤੱਕ ਕਿ ਸ਼੍ਰੋਮਣੀ ਅਕਾਲੀ ਦਲ (ਦਿੱਲੀ) ਦੀ ਚਰਚਿਤ ਪੰਥਕ ਏਕਤਾ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ ਜਿਸਦਾ ਸਾਂਝਾ ਉਮੀਦਵਾਰ ਮਾਝੇ ਦੀ ਇਸ ਪੰਥਕ ਸੀਟ ‘ਤੇ ਮੁੜ ਉੱਭਰੀ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਲਹਿਰ ਹੇਠ ਢਹਿ ਗਿਆ।
ਇਹ ਜਿਮਨੀ ਚੋਣ ਇੱਕ ਸਾਂਝੇ ਪੰਥਕ ਪੁਨਰ-ਉਭਾਰ ਨੂੰ ਪੇਸ਼ ਕਰਨ ਦਾ ਮੌਕਾ ਸੀ। ਇਸ ਦੀ ਬਜਾਏ ਇਹ ਗਠਜੋੜ ਦੇ ਅੰਦਰ ਅਵਿਸ਼ਵਾਸ, ਵੱਖੋ ਵੱਖਰੀ ਡੱਫਲੀ ਵਜਾਉਣ ਅਤੇ ਮੁਕਾਬਲੇ ਭਰੇ ਹੰਕਾਰ ਨੂੰ ਉਜਾਗਰ ਕਰਨ ਵਿੱਚ ਸਫਲ ਰਹੀ। ਵਾਰਿਸ ਪੰਜਾਬ ਦੇ ਮੁਖੀ ਅੰਮ੍ਰਿਤਪਾਲ ਸਿੰਘ, ਗਿਆਨੀ ਹਰਪ੍ਰੀਤ ਸਿੰਘ ਵਾਲੇ ਪੁਨਰ ਸੁਰਜੀਤ ਅਕਾਲੀ ਦਲ, ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਅਤੇ ਆਲ ਇੰਡੀਆ ਸਿੱਖ ਸਟੂਡੈਂਟਸ ਫੈਡਰੇਸ਼ਨ (AISSF) ਆਪੋ-ਆਪਣੇ ਪ੍ਰਭਾਵ ਸਦਕਾ ਆਪਣੇ ਸਾਂਝੇ ਆਜ਼ਾਦ ਉਮੀਦਵਾਰ ਮਨਦੀਪ ਸਿੰਘ ਨੂੰ ਵੋਟਾਂ ਵਿੱਚ ਜਿਤਾਉਣ ਵਿੱਚ ਅਸਫਲ ਰਹੇ।
ਮਨਦੀਪ ਸਿੰਘ ਤੀਜੇ ਸਥਾਨ ‘ਤੇ ਖਿਸਕ ਗਿਆ ਜੋ ਕਿ ਗਠਜੋੜ ਦੇ ਉਸ ਦਾਅਵੇ ਤੋਂ ਬਹੁਤ ਦੂਰ ਹੈ ਕਿ ਉਹ ਸਭ ਤੋਂ ਬਿਹਤਰ ਪ੍ਰਦਰਸ਼ਨ ਕਰੇਗਾ। ਉਹ ਸੰਦੀਪ ਸਿੰਘ ਦਾ ਭਰਾ ਹੈ ਜੋ ਸ਼ਿਵ ਸੈਨਾ (ਟਕਸਾਲੀ) ਦੇ ਨੇਤਾ ਸੁਧੀਰ ਸੂਰੀ ਦੇ ਕਤਲ ਕੇਸ ਵਿੱਚ ਜੇਲ੍ਹ ਵਿੱਚ ਬੰਦ ਹੈ।
ਇਸ ਸਾਲ ਦੇ ਸ਼ੁਰੂ ਵਿੱਚ ਅੰਮ੍ਰਿਤਪਾਲ ਸਿੰਘ ਦੀ ਲੋਕ ਸਭਾ ਵਿੱਚ ਹੋਈ ਸ਼ਾਨਦਾਰ ਜਿੱਤ ਨਾਲ ਤੁਲਨਾ ਨੂੰ ਦੇਖਦੇ ਹੋਏ ਇਹ ਹਾਰ ਖਾਸ ਤੌਰ ‘ਤੇ ਹੈਰਾਨ ਕਰਨ ਵਾਲੀ ਹੈ। ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨੇ ਪੇਂਡੂ ਬੂਥਾਂ ‘ਤੇ ਆਪਣੀ ਪਕੜ ਮਜ਼ਬੂਤ ਕਰ ਕਰਕੇ ਪਿਛਲੀਆਂ ਚੋਣਾਂ ਵਿੱਚ ਗੁਆਚੀ ਸ਼ਾਖ ਮੁੜ ਬਹਾਲ ਕਰ ਲਈ।
ਰਾਜਨੀਤਿਕ ਨਿਰੀਖਕਾਂ ਦਾ ਕਹਿਣਾ ਹੈ ਕਿ ਗਠਜੋੜ ਨੂੰ ਮਾੜੇ ਤਾਲਮੇਲ, ਸੰਚਾਰ ਪਾੜੇ ਅਤੇ ਇੱਕ ਨੁਕਸਦਾਰ ਚੋਣ ਮੁਹਿੰਮ ਰਣਨੀਤੀ ਦਾ ਸਾਹਮਣਾ ਕਰਨਾ ਪਿਆ। ਗਿਆਨੀ ਹਰਪ੍ਰੀਤ ਸਿੰਘ ਅਤੇ ਸਿਮਰਨਜੀਤ ਸਿੰਘ ਮਾਨ ਦੀਆਂ ਤਸਵੀਰਾਂ ਨੂੰ ਪ੍ਰਚਾਰ ਪੋਸਟਰਾਂ ਤੇ ਨਾ ਲਗਾਉਣ ਵਰਗੇ ਬੁਨਿਆਦੀ ਮੁੱਦਿਆਂ ਨੇ ਵੀ ਨਾਰਾਜ਼ਗੀ ਨੂੰ ਹਵਾ ਦਿੱਤੀ ਅਤੇ ਸਪੱਸ਼ਟ ਮਤਭੇਦ ਦਾ ਸੰਕੇਤ ਦਿੱਤਾ। ਸੀਨੀਅਰ ਆਗੂ ਜਿਨ੍ਹਾਂ ਤੋਂ ਵੋਟਰਾਂ ਨੂੰ ਲਾਮਬੰਦ ਕਰਨ ਦੀ ਉਮੀਦ ਕੀਤੀ ਜਾਂਦੀ ਸੀ, ਅਕਸਰ ਮੈਦਾਨ ਤੋਂ ਗਾਇਬ ਰਹਿੰਦੇ ਰਹੇ ਜਾਂ ਵੱਖਰੇ ਤੌਰ ‘ਤੇ ਪ੍ਰਚਾਰ ਕਰਦੇ ਰਹੇ ਜਿਸ ਕਾਰਨ ਅੰਦਰੂਨੀ ਗੁੱਟਬੰਦੀ ਦੇ ਦੋਸ਼ ਲੱਗਦੇ ਸਨ।
ਇਸ ਤੋਂ ਬਾਅਦ ਪੁਨਰਗਠਿਤ ਅਕਾਲੀ ਦਲ ਨੇ ਐਲਾਨ ਕੀਤਾ ਹੈ ਕਿ ਉਹ ਆਉਣ ਵਾਲੀਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਚੋਣਾਂ ਵਿੱਚ ਆਪਣਾ ਰਸਤਾ ਖੁਦ ਤੈਅ ਕਰੇਗਾ। ਇਸਦੇ ਬੁਲਾਰੇ ਨੇ ਕਿਹਾ ਕਿ ਪਾਰਟੀ ਵਾਰਿਸ ਪੰਜਾਬ ਦੇ ਧੜੇ ਤੋਂ ਵੱਖਰੇ ਤੌਰ ‘ਤੇ ਚੋਣ ਲੜੇਗੀ ਹਾਲਾਂਕਿ ਹੋਰ ਪੰਥਕ ਦਲਾਂ ਨਾਲ ਸਹਿਯੋਗ ਲਈ ਰਾਹ ਖੁੱਲ੍ਹਾ ਹੈ। ਇਹ ਬਿਆਨ ਇੱਕ ਵਧਦੀ ਦਰਾਰ ਦੀ ਪੁਸ਼ਟੀ ਕਰਦਾ ਹੈ ਅਤੇ ਸਿੱਖ ਰਾਜਨੀਤੀ ਵਿੱਚ ਇੱਕ ਨਵੇਂ ਪੜਾਅ ਦੀ ਨਿਸ਼ਾਨਦੇਹੀ ਕਰਦਾ ਹੈ। ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਨੇਤਾ ਸਿਮਰਨਜੀਤ ਸਿੰਘ ਮਾਨ ਨੇ ਵੀ ਸਾਰੀਆਂ ਪੰਥਕ ਪਾਰਟੀਆਂ ਨੂੰ ਭਵਿੱਖ ਵਿੱਚ ਚੋਣਾਂ ਲੜਨ ਲਈ ਇੱਕਜੁੱਟ ਹੋਣ ਦਾ ਸਪੱਸ਼ਟ ਸੱਦਾ ਦਿੱਤਾ ਹੈ ਅਤੇ ਇੱਥੋਂ ਤੱਕ ਕਹਿ ਦਿੱਤਾ ਹੈ ਕਿ ਉਹ ਅਜਿਹੀ ਏਕਤਾ ਲਈ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦੇ ਸੁਖਬੀਰ ਸਿੰਘ ਬਾਦਲ ਦੀ ਅਗਵਾਈ ਨੂੰ ਵੀ ਸਵੀਕਾਰ ਕਰਨ ਲਈ ਤਿਆਰ ਹਨ।
ਦੂਜੇ ਪਾਸੇ ਵਾਰਿਸ ਪੰਜਾਬ ਦੇ ਆਗੂ ਇਸ ਗੱਲ ‘ਤੇ ਜ਼ੋਰ ਦਿੰਦੇ ਹਨ ਕਿ ਗੱਠਜੋੜ ਦੇ ਅੰਦਰ ਕਿਸੇ ਨੂੰ ਅਣਗੌਲੇ ਕਰਨ ਦੀ ਕੋਈ ਗੱਲ ਨਹੀਂ ਸੀ ਅਤੇ ਹਾਰ ਦਾ ਦੋਸ਼ ਵਿਰੋਧੀਆਂ ਦੇ ਵਿੱਤੀ ਪ੍ਰਭਾਵ ਅਤੇ ਸਰਕਾਰੀ ਮਸ਼ੀਨਰੀ ‘ਤੇ ਲਗਾਇਆ ਹੈ। ਪਰ ਜ਼ਮੀਨੀ ਪੱਧਰ ਦੇ ਸਮਰਥਕਾਂ ਵਿੱਚ ਪਹਿਲਾਂ ਹੀ ਇਹ ਸਵਾਲ ਉਠਾਏ ਜਾ ਰਹੇ ਹਨ ਕਿ ਕੀ ਪੰਥਕ ਫਰੰਟ ਨੇ ਆਪਣੀ ਤਾਕਤ ਦਾ ਜ਼ਿਆਦਾ ਅੰਦਾਜ਼ਾ ਲਗਾਇਆ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦੀ ਸੰਗਠਨਾਤਮਕ ਤਾਕਤ ਨੂੰ ਕਮਜ਼ੋਰ ਸਮਝਿਆ ਜੋ ਇਸ ਚੋਣ ਵਿੱਚ ਬਿਹਤਰ ਪ੍ਰਦਰਸ਼ਨ ਨਾਲ ਲੋਕਾਂ ਤੋਂ ਮੁੜ ਵਿਸ਼ਵਾਸ ਹਾਸਲ ਕਰਦਾ ਜਾਪਦਾ ਹੈ।
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਨੇੜੇ ਆਉਣ ਕਰਕੇ ਤਰਨਤਾਰਨ ਚੋਣ ਦੇ ਫੈਸਲੇ ਨੇ ਪੰਜਾਬ ਦੇ ਰਾਜਨੀਤਿਕ ਮੂਡ ਨੂੰ ਮੁੜ ਖੰਭ ਲਾ ਦਿੱਤੇ ਹਨ। ਇੱਕ ਏਕਤਾ ਵਾਲੀ ਪੰਥਕ ਵਾਪਸੀ ਦਿਖਾਉਣ ਦੀ ਬਜਾਏ ਇਸ ਜ਼ਿਮਨੀ ਚੋਣ ਨੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦੀ ਸਥਿਤੀ ਨੂੰ ਮੁੜ ਸੁਰਜੀਤ ਕਰ ਦਿੱਤਾ ਹੈ ਅਤੇ ਚੁਣੌਤੀਆਂ ਦੇ ਅੰਦਰ ਇੱਕ ਨਵੀਂ ਸੱਤਾ ਸੰਘਰਸ਼ ਲਈ ਸ਼ੁਰੂ ਹੋ ਗਿਆ ਹੈ। ਅਗਲੇ ਕੁਝ ਮਹੀਨੇ ਇਹ ਫੈਸਲਾ ਕਰਨਗੇ ਕਿ ਕੀ ਟੁੱਟਿਆ ਹੋਇਆ ਗਠਜੋੜ ਵਿਸ਼ਵਾਸ ਨੂੰ ਦੁਬਾਰਾ ਕਾਇਮ ਸਕਦਾ ਹੈ ਜਾਂ ਕੀ ਉਪ ਚੋਣ ਪੰਜਾਬ ਦੀ ਸਿੱਖ ਰਾਜਨੀਤੀ ਵਿੱਚ ਇੱਕ ਵੱਡੇ ਪੁਨਰਗਠਨ ਦੀ ਸ਼ੁਰੂਆਤ ਦੀ ਬਾਤ ਪਾਉਂਦੀ ਹੈ।
