ਸੁਪਰੀਮ ਕੋਰਟ ਦੇ ਹੁਕਮ ਮੁਤਾਬਿਕ ਦੋ ਹੋਰ ਮਹਿਲਾ ਵਕੀਲਾਂ ਨੂੰ ਕੀਤਾ ਜਾਵੇਗਾ ਕੋਆਪਟ
ਚੰਡੀਗੜ੍ਹ, 30 ਅਪ੍ਰੈਲ 2026 (ਫਤਿਹ ਪੰਜਾਬ ਬਿਊਰੋ) : ਪੰਜਾਬ ਅਤੇ ਹਰਿਆਣਾ ਬਾਰ ਕੌਂਸਲ ਨੇ ਬੁੱਧਵਾਰ ਨੂੰ 2026 ਦੀਆਂ ਚੋਣਾਂ ਦੇ ਨਤੀਜੇ ਐਲਾਨ ਦਿੱਤੇ ਹਨ ਜਿਸ ਵਿੱਚ ਪੰਜ ਹਫ਼ਤਿਆਂ ਤੱਕ ਚੱਲੀ ਵੋਟਾਂ ਦੀ ਗਿਣਤੀ ਮਗਰੋਂ 23 ਮੈਂਬਰ ਚੁਣੇ ਗਏ ਹਨ। ਇਨ੍ਹਾਂ ਚੋਣਾਂ ਲਈ ਵੋਟਿੰਗ 17 ਅਤੇ 18 ਮਾਰਚ ਨੂੰ ਪੰਜਾਬ, ਹਰਿਆਣਾ ਅਤੇ ਚੰਡੀਗੜ੍ਹ ਵਿੱਚ ਹੋਈ ਸੀ। ਰਿਟਰਨਿੰਗ ਅਧਿਕਾਰੀ ਵੱਲੋਂ ਜਾਰੀ ਬਿਆਨ ਅਨੁਸਾਰ ਵੋਟਾਂ ਦੀ ਗਿਣਤੀ 20 ਮਾਰਚ ਤੋਂ ਸ਼ੁਰੂ ਹੋ ਕੇ 29 ਅਪ੍ਰੈਲ ਨੂੰ ਮੁਕੰਮਲ ਹੋਈ।
ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੀ ਸਾਬਕਾ ਜੱਜ ਜਸਟਿਸ ਜੈਸ਼ਰੀ ਠਾਕੁਰ, ਜਿਨ੍ਹਾਂ ਨੇ ਰਿਟਰਨਿੰਗ ਅਧਿਕਾਰੀ ਵਜੋਂ ਜ਼ਿੰਮੇਵਾਰੀ ਨਿਭਾਈ, ਵੱਲੋਂ ਅੰਤਿਮ ਨਤੀਜੇ ਜਾਰੀ ਕੀਤੇ ਗਏ। ਚੁਣੇ ਗਏ ਮੈਂਬਰਾਂ ਵਿੱਚੋਂ ਪਹਿਲੇ 18 ਉਮੀਦਵਾਰਾਂ ਨੂੰ ਇੱਕੋ ਜਿਹੀਆਂ 3,31,721 ਵੋਟਾਂ ਪ੍ਰਾਪਤ ਹੋਈਆਂ। ਇਨ੍ਹਾਂ ਵਿੱਚ ਸੁਵੀਰ ਸਿੱਧੂ, ਕਰਨਜੀਤ ਸਿੰਘ, ਅਜੈ ਚੌਧਰੀ, ਮਿੰਦਰਜੀਤ ਯਾਦਵ, ਰਾਜਿੰਦਰ ਜੁਨੇਜਾ, ਗੁਰਤੇਜ ਸਿੰਘ ਗਰੇਵਾਲ, ਪ੍ਰਧੂਮਨ ਗਰਗ, ਪ੍ਰਵੇਸ਼ ਯਾਦਵ, ਪ੍ਰਦੀਪ ਪਰਮਾਰ, ਪ੍ਰਤਾਪ ਸਿੰਘ, ਅਮਿਤ ਰਾਣਾ, ਹਰਪ੍ਰੀਤ ਸਿੰਘ ਮੁਲਤਾਨੀ, ਵਿਜੇਂਦਰ ਸਿੰਘ ਅਹਿਲਾਵਤ, ਕਰਮਜੀਤ ਸਿੰਘ, ਰਜਤ ਗੌਤਮ, ਰਾਕੇਸ਼ ਗੁਪਤਾ, ਨੀਰਜ ਸ਼ਿਓਰਾਣ ਅਤੇ ਦਿਆਲ ਪ੍ਰਤਾਪ ਸਿੰਘ ਰੰਧਾਵਾ ਸ਼ਾਮਲ ਹਨ।
ਬਾਕੀ ਪੰਜ ਸੀਟਾਂ ਮਹਿਲਾ ਵਕੀਲਾਂ ਨੇ ਜਿੱਤੀਆਂ। ਇਸ ਵਰਗ ਵਿੱਚ ਅੰਜਲੀ ਸਹਿਰਾਵਤ ਨੇ 2,17,700 ਵੋਟਾਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ ਜਦਕਿ ਸੁਨੀਤਾ ਕਲਸਨ ਨੂੰ 38,800, ਅਮਰਜੀਤ ਕੌਰ ਨੂੰ 34,900, ਰਾਜਨੀ ਨੰਦਾ ਨੂੰ 32,000 ਅਤੇ ਸ਼ਰਮੀਲਾ ਸ਼ਰਮਾ ਨੂੰ 28,600 ਵੋਟਾਂ ਮਿਲੀਆਂ।
ਉਚ ਤਾਕਤੀ ਚੋਣ ਕਮੇਟੀ ਦੇ ਪ੍ਰਧਾਨ ਸੇਵਾਮੁਕਤ ਜਸਟਿਸ ਰਣਜੀਤ ਸਿੰਘ ਵੱਲੋਂ ਬਾਰ ਕੌਂਸਲ ਆਫ਼ ਇੰਡੀਆ ਨੂੰ ਭੇਜੇ ਗਏ ਪੱਤਰ ਵਿੱਚ 23 ਉਮੀਦਵਾਰਾਂ ਨੂੰ ਵਿਧਿਵਤ ਤੌਰ ‘ਤੇ ਚੁਣੇ ਗਏ ਮੈਂਬਰ ਐਲਾਨਣ ਦੀ ਸਿਫਾਰਸ਼ ਕੀਤੀ ਗਈ ਹੈ। ਉਨ੍ਹਾਂ ਨੇ ਇਹ ਵੀ ਦਰਸਾਇਆ ਕਿ 8 ਦਸੰਬਰ 2026 ਨੂੰ ਸਪਰੀਮ ਕੋਰਟ ਵੱਲੋਂ ਯੋਗਮਾਇਆ ਐਮ. ਜੀ. ਬਨਾਮ ਯੂਨੀਅਨ ਆਫ਼ ਇੰਡੀਆ ਆਦਿ ਮਾਮਲੇ ਵਿੱਚ ਦਿੱਤੇ ਗਏ ਹੁਕਮਾਂ ਅਨੁਸਾਰ ਦੋ ਹੋਰ ਮਹਿਲਾ ਵਕੀਲਾਂ ਨੂੰ ਕੌਂਸਲ ਵਿੱਚ ਕੋਆਪਟ ਕੀਤਾ ਜਾਣਾ ਹੈ।
