ਸੱਚਾ ਸੌਦਾ ਸਾਧ ਨੇ ਹੁਣ ਤੱਕ ਲਈ 446 ਦਿਨਾਂ ਦੀ ਪੈਰੋਲ
ਚੰਡੀਗੜ੍ਹ, 26 ਮਈ 2026 (ਫਤਿਹ ਪੰਜਾਬ ਬਿਊਰੋ) : ਸਿਰਸਾ ਸਥਿਤ ਡੇਰਾ ਸੱਚਾ ਸੌਦਾ ਦੇ ਦੋਸ਼ੀ ਮੁਖੀ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ ਸੋਮਵਾਰ ਨੂੰ 30 ਦਿਨਾਂ ਦੀ ਹੋਰ ਪੈਰੋਲ ਦੇ ਦਿੱਤੀ ਗਈ। ਸਾਲ 2020 ਤੋਂ ਬਾਅਦ ਇਹ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਤੋਂ ਉਸਦੀ 16ਵੀਂ ਅਸਥਾਈ ਰਿਹਾਈ ਹੈ।
ਇਸ ਤਾਜ਼ਾ ਪੈਰੋਲ ਨਾਲ ਹੀ ਜੇਲ੍ਹ ਰਿਕਾਰਡ ਵਿੱਚ ਕੈਦੀ ਨੰਬਰ 8647/C ਵਜੋਂ ਦਰਜ ਡੇਰਾ ਮੁਖੀ ਨੇ ਹਰਿਆਣਾ ਗੁੱਡ ਕੰਡਕਟ ਪ੍ਰਿਜ਼ਨਰਜ਼ (ਟੈਂਪਰੇਰੀ ਰਿਲੀਜ਼) ਐਕਟ, 2022 ਤਹਿਤ ਸਾਲ 2026 ਲਈ ਨਿਰਧਾਰਿਤ 10 ਹਫ਼ਤਿਆਂ ਦੀ ਪੂਰੀ ਪੈਰੋਲ ਮਿਆਦ ਸਮਾਪਤ ਕਰ ਲਈ ਹੈ। ਇਸ ਤੋਂ ਪਹਿਲਾਂ ਉਸਨੂੰ ਜਨਵਰੀ ਮਹੀਨੇ ਵਿੱਚ 40 ਦਿਨਾਂ ਦੀ ਪੈਰੋਲ ਦਿੱਤੀ ਗਈ ਸੀ।
ਰਾਮ ਰਹੀਮ 25 ਅਗਸਤ 2017 ਤੋਂ ਜੇਲ੍ਹ ਵਿੱਚ ਬੰਦ ਹੈ। ਇਸੇ ਦਿਨ ਇੱਕ ਵਿਸ਼ੇਸ਼ ਸੀਬੀਆਈ ਅਦਾਲਤ ਨੇ ਉਸਨੂੰ ਦੋ ਮਹਿਲਾ ਸਾਧਣੀਆਂ ਨਾਲ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੰਦਿਆਂ 20 ਸਾਲ ਦੀ ਸਜ਼ਾ ਸੁਣਾਈ ਸੀ। ਇਸ ਪਿੱਛੋਂ 17 ਜਨਵਰੀ 2019 ਨੂੰ ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਦੇ ਕਤਲ ਕੇਸ ਵਿੱਚ ਵੀ ਉਸਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਅਕਤੂਬਰ 2021 ਵਿੱਚ ਸੀਬੀਆਈ ਅਦਾਲਤ ਨੇ ਡੇਰੇ ਦੇ ਮੈਨੇਜਰ ਰਣਜੀਤ ਸਿੰਘ ਕਤਲ ਸਾਜ਼ਿਸ਼ ਮਾਮਲੇ ਵਿੱਚ ਵੀ ਉਸਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ। ਹਾਲਾਂਕਿ ਬਾਅਦ ਵਿੱਚ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਉਸਨੂੰ ਉਕਤ ਦੋਵਾਂ ਮੁਕੱਦਮਿਆਂ ਵਿੱਚੋਂ ਬਰੀ ਕਰ ਦਿੱਤਾ ਸੀ। ਰਣਜੀਤ ਸਿੰਘ ਕਤਲ ਕੇਸ ਵਿੱਚ 2024 ਦੌਰਾਨ ਅਤੇ ਛੱਤਰਪਤੀ ਕਤਲ ਕੇਸ ਵਿੱਚ ਇਸੇ ਸਾਲ 2026 ਵਿੱਚ ਵੀ ਉਸਨੂੰ ਰਾਹਤ ਮਿਲੀ ਹੈ।
ਹੁਣ ਤੱਕ ਦੀ ਸਜ਼ਾ ਮਿਆਦ ਕਰੀਬ ਅੱਠ ਸਾਲ ਅੱਠ ਮਹੀਨੇ, ਅਰਥਾਤ ਕੁੱਲ 3,193 ਦਿਨ ਬਣਦੀ ਹੈ ਜਿਸ ਵਿੱਚੋਂ ਰਾਮ ਰਹੀਮ 406 ਦਿਨ ਜੇਲ੍ਹ ਤੋਂ ਬਾਹਰ ਬਿਤਾ ਚੁੱਕਾ ਹੈ। ਕਿਉਂਕਿ ਪੈਰੋਲ ਦੀ ਮਿਆਦ ਕੁੱਲ ਸਜ਼ਾ ਵਿੱਚ ਸ਼ਾਮਲ ਨਹੀਂ ਕੀਤੀ ਜਾਂਦੀ ਇਸ ਲਈ ਬਾਹਰ ਬਿਤਾਏ ਇਹ ਦਿਨ ਉਸਦੀ ਸਜ਼ਾ ਵਿੱਚੋਂ ਘਟਾਏ ਨਹੀਂ ਜਾਣਗੇ। ਫਰਲੋ ਇਸ ਤੋਂ ਵੱਖਰੀ ਹੁੰਦੀ ਹੈ। ਫਰਲੋ ਦੌਰਾਨ ਬਿਤਾਇਆ ਸਮਾਂ ਕੁੱਲ ਸਜ਼ਾ ਵਿੱਚ ਗਿਣਿਆ ਜਾਂਦਾ ਹੈ ਅਰਥਾਤ ਫਰਲੋ ਦੀ ਮਿਆਦ ਮੁੜ ਨਹੀਂ ਕੱਟਣੀ ਪੈਂਦੀ।
ਸਾਲ 2022 ਦੇ ਕਾਨੂੰਨ ਅਨੁਸਾਰ ਕਿਸੇ ਵੀ ਕੈਦੀ ਨੂੰ ਇੱਕ ਕੈਲੰਡਰ ਸਾਲ ਦੌਰਾਨ ਵੱਧ ਤੋਂ ਵੱਧ 10 ਹਫ਼ਤਿਆਂ ਦੀ ਪੈਰੋਲ ਮਿਲ ਸਕਦੀ ਹੈ, ਜਿਸਨੂੰ ਦੋ ਹਿੱਸਿਆਂ ਵਿੱਚ ਲਿਆ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ ਤਿੰਨ ਹਫ਼ਤਿਆਂ ਦੀ ਫਰਲੋ ਦਾ ਵੀ ਪ੍ਰਬੰਧ ਹੈ ਜੋ ਇੱਕੋ ਵਾਰ ਅਤੇ ਬਿਨਾਂ ਕਿਸੇ ਰੁਕਾਵਟ ਦੇ ਲਈ ਜਾਣੀ ਹੁੰਦੀ ਹੈ। ਰਾਮ ਰਹੀਮ ਕੋਲ ਹਾਲੇ ਵੀ ਇਸ ਚਾਲੂ ਸਾਲ ਦੌਰਾਨ ਤਿੰਨ ਹਫ਼ਤਿਆਂ ਦੀ ਫਰਲੋ ਲੈ ਸਕਦਾ ਹੈ। ਇਸ ਤੋਂ ਇਲਾਵਾ ਜਿਵੇਂ ਹੀ ਉਹ ਆਪਣੀ 20 ਸਾਲ ਦੀ ਸਜ਼ਾ ਦਾ ਤਿੰਨ-ਚੌਥਾਈ ਹਿੱਸਾ ਪੂਰਾ ਕਰ ਲਵੇਗਾ ਤਾਂ ਕਾਨੂੰਨ ਤਹਿਤ ਉਸਨੂੰ ਚਾਰ ਹਫ਼ਤਿਆਂ ਦੀ ਵਧਾਈ ਗਈ ਫਰਲੋ ਦਾ ਹੱਕ ਵੀ ਮਿਲੇਗਾ ਹਾਲਾਂਕਿ ਉਹ ਵੀ ਇੱਕੋ ਵਾਰ ਅਤੇ ਬਿਨਾਂ ਕਿਸੇ ਰੁਕਾਵਟ ਦੇ ਲਈ ਜਾਣੀ ਹੋਵੇਗੀ।